Angry Birds

عود حميد للكتابه

بصراحه توقفت كثيرا عن الكتابه (انا اصلا يعتبر ما كتبتش علشان اقف ) بس ما علينا ,
المهم كانت بتيجى فى دماغى مواضييع كتير عاوز اكتب عنها
بس لغرض او لسبب ما او لكسل ما الواحد ما يكتبش حاجه
ربنا يسهلو الواحد يكتب شويه

المهم مش هاصدعكم معايا فى سبب التوقف او الكتابه (دا باعتبار ان فى ناس بتقرأ اللى باكتبه :)  )

و انا قاعد و عندى حاجات كتير اعملها ( عمل و شخصى ) و مليش نفس اعمل حاجه

فعمال ادعبس فى اللاب توب و اتفرج على فيلم او اشغل لعبه و اتسلى فيها , وقعت عينى على لعبه angry birds

فتحتها و لعبتها شويه و سرحت

يا ترى هو فى حد لسه بيلعبها

أصل اللعبه دى لما طلعت كانت حمى حول العالم كله و الناس بتتسابق علشان تخلصها و اتعمل عليها افلام و مجسمات و برامج

و قول زى ما انت عاوز

و قيل وقتها ان اصحاب اللعبه عدوا الفلنكات

و دلوقتى بخخخخخخخخخخخخخخخخخخخخخخ مفيش صوت لها

طيب ما علينا من اصحابها , اهو كسبوا اللى فيه النصيب و خلاص

انما باقى الناس هل كسبوا
طبعا المكسب مش مادى بس , و كمان معنوى بس السؤال هنا هل ما كسبته يكافئ ما انفقته فيها

اقول هذا لان تلك الايام هناك حالة حمى شبهها و هى لعبه candy crush و الناس بتتفاخر بالمستوى اللى وصلت له

و منافسه بين الاصدقاء و المعارف و هناك من يغير اعدادت تليفونه الخاصه بالتاريخ و الوقت لكى يتلاعب فى عدد lives

طب و بعدين .......................هاتطلع لعبه بعدها و تبقى هى الحمى الجديده و هكذا دواليك

واحد بيقرا البوست هايقولى , انت عاوز ايه من الهرى دا كله

اقوله ممكن مكونش عاوز حاجه معينه بس برصد ظاهره

اصل لو اتكلمت و قولت الغرب و تضييع الوقت و خلافه هايبقى دمى تقيل و اتكلم فى مثاليات عفى عليها الزمن

و من لم يشغله candy crush شغلته لعبه اخرى او اى حاجه تانيه تضيع وقته و خلاص

و بمناسبه الوقت ,

ان شاء الله سيكون الموضوع القادم عن الوقت

السلام ختام

اه نسيت محدش جاوبنى
هو لسه فى حد بيلعب angry birds

حرب على المساجد

السلام عليكم
اولا كل عام و انتم بخير بمناسبه شهر رمضان
اللهم ارزقنا فيه حسن الصلاه و الصوم و اجعلنا فيه من الفائزين
------------------------------------------------------------
وجدت ناس كتيره تتكلم الان فى حكايه ان المسجد يتقفل بعد الصلاه , او انهم بيقطعوا النور عن المسجد

و طبعا لازم مع الكلام ده الهمز و اللمز على الكنائس و فى الاخر تقال جمله

انها حرب على الاسلام

طيب واحده واحده , اولا انا لن ادافع عن القرارت المتعلقه بالمساجد او اهاجمها فليس هذا موضوعى

و لكنى اردت ان اقول شيئا بمناسبه الحرب على الاسلام

ايام مبارك , كانت المساجد مفتوحه و الدروس مسموحه رغم ان حظه يبقى مش تمام اللى مربى دقنه و داخل وظيفه مهمه

او اراد ان يدخل احدى دور القوات المسلحه و بالطبع يتم منعه لمجرد انه اطلق لحيته و لم يتفوه احد وقتها انها حرب على الاسلام .....ليه ؟؟؟؟

صعب انك كنت تلاقى واحد ابوه ملتحى و يدخل شرطه او جيش و برضه محدش كان بيقول حرب على الاسلام

على ما نسمع ان كانت ناس كتير بتتشد فى امن الدوله لانها ملتحيه (دا اللى كنا بنسمعه) و لم نرى شخص يقول انها حرب على الاسلام

عاوز اقول كلمه صغيره :

الحرب على الاسلام للأسف بدأت بيد المسلمين نفسهم

لما المسجد بقى مكان للنوم و تخرج من جنباته رائحه عرق و عطانه , الا لو مسجد فى منطقه نظيفه و اهل المنطقه مهتمين به

لما كل مجموعه عملت لنفسها جامع و شيخ و هاجمت الاخرين

لما بقينا نمسح بكرامه شيخ الارض لمجرد خلاف سياسى معه و قبلها كنا بنعتبره قامه العلم الشرعى

لما اصبحنا لا نحترم المسجد و نرفع اصواتنا فيه و ممكن ننزل خطيب من فوق المنبر فى صلاه جمعه لمجرد اشارته لشئ سياسى و الجلوس مختلفين معه فيه و للأسف وقتها الناس اعتبرت اللى عمل كده ابطال صناديد

لما خلينا الدين كله عباره عن تكفير للغير

للأسف انتم من فعلتم فى انفسكم هذا فلا تلوموا الاخر على فعله

للأسف كله اتربى بدون ما يعرف قيمه المسجد و دوره فى تربيه الصغار على القيم قبل اى شئ

الاسلام دين معاملات

ربنا يهدى الجميع لما فيه الخير

شكرا سياده المستشار , اهلا بسياده المشير

اليوم 8 - 6 - 2014 يوم مش عادى

هو يوم حلف اليمين لرئيس جمهوريه مصر العربيه

و قبل اى شئ يجب ان نقول شكرا لسياده المستشار الذى مر بالبلاد الى تلك اللحظه فى حياتنا

رجل محترم بكل ما تعنيه الكلمه

سياده المشير / رئيس جمهوريه مصر العربيه

اهلا بك و الله معك 

ربنا يوفقك لما فيه الخير لصالح تلك البلد

سياده الرئيس نحن كلنا امانه فى عنقك فيا لها من مسئوليه , اعانك الله عليها

نحن معك ان شاء الله فى سبيل بلدنا فسر على بركه الله

---------------------------


يا رب نفوق بقى و نشوف عملنا و مستقبلنا 

على بركه الله نبدأ

دوس على كل الصعب

ام كلثوم

تلك السيده التى عشقت الاستماع اليها بعد المرحله الثانويه و عرفت يعنى ايه طرب

و معها عرفت معنى الاستمتاعع بالمقدمه الموسيقيه لأغنية ما , و يا سلام لو كانت لبليغ او للسنباطى

المهم , منذ فتره و انا استمع الى الاغانى الوطنيه ابان ثوره 23 يوليو , و حتى نصر 73

و خاصه اغانى الفتره 56-67

كلمات غير عاديه احس فيها بالكثير من الروعه و هانتكلم على كذا اغنيه لاحقا , 

المهم اغنيه النهارده اسمها حق بلادك

كلمات غير عاديه مع لحن وهمى 

بعد بحث وجدت ان المؤلف عبد الوهاب محمد و الملحن هو السنباطى
****************************************************************
قوم بايمان وبروح وضمير
دوس علي كل الصعب علي كل الصعب وسير

حق بلادك وحده عليك
عايز منك سعي كتير دوس علي كل الصعب وسير 

ادى لعملك جهد زياده ده الاخلاص فعملنا عباده
قوم بايمان وبروح وضمير
دوس علي كل الصعب علي كل الصعب وسير

ابنى وزود من امجادك ابنى لوطنك ولاولادك
فكر ابحث ازرع صنع

كل مجاهد هينول امله ربنا مش هيضيع ابداً اجر مكافح يتقن عمله
اخلق جدد انتج صدر خلى بلادك تقوه وتكبر
قوم بايمان وبروح وضمير
دوس علي كل الصعب علي كل الصعب وسير
حق بلادك وحده عليك
عايز منك سعي كتير دوس علي كل الصعب وسير 

ادى لعملك جهد زياده ده الاخلاص فعملنا عباده
قوم بايمان وبروح وضمير
دوس علي كل الصعب علي كل الصعب وسير
يلي بنيت الهرم قبل الزمان بزمان وبنيت لنفع عصرنا السد في اسوان
كمل لمجد الوطن وابني كمان وكمان

خلي الامل بالعمل يصبح وجود ممدود
ده انت مفيش يابطل من معدنك انسان
قوم بايمان وبروح وضمير
دوس علي كل الصعب علي كل الصعب وسير
حق بلادك وحده عليك
عايز منك سعي كتير دوس علي كل الصعب وسير 

ادى لعملك جهد زياده ده الاخلاص فعملنا عباده
قوم بايمان وبروح وضمير
دوس علي كل الصعب علي كل الصعب وسير

كلنا جندي فى كل ميدان هنا وهناك وفي اي مكان
الزراع ويا الصناع اهل العلم مع الفنان

زي ملينا حقوق مشروعه ندي وطنا حقوقه كمان 
انوي سمي صلي كبر توصل فوق المعجزة واكتر
قوم بايمان وبروح وضمير
دوس علي كل الصعب علي كل الصعب وسير
حق بلادك وحده عليك
عايز منك سعي كتير دوس علي كل الصعب وسير 

ادى لعملك جهد زياده ده الاخلاص فعملنا عباده
قوم بايمان وبروح وضمير
دوس علي كل الصعب علي كل الصعب وسير
***********************************************

زعلت اوى لما عرفت انها كانت بعد نكسه 67 

و استغربت فى ان كلمات و لحن يجعلوا الحجر يتحرك , زى الكلمات اللى كانت قبل النكسه بالضبط 

و عرفت ان احنا بتوع كلاااااااااااااااااااااااام و افتكرت مقطع للدكتور مصطفى محمود رحمه الله

كان يقول اغانى عبده حريقه ههههههههههه شر البليه ما يضحك فعلا

كل ما اسمع هذا المقطع احس انى عاوز ابكى

----------------------

يا ترى متفقين معى ام هناك من يختلف

كلمه صغيره

ملحوظه صغيره :

موضوع قديم تم نشره على مدونتى القديمه بتاريخ 26 - يوليو - 2013 و احببت ان اضعه هنا كى تكون كتاباتى كامله فى مكان واحد.

مدونتى القديمه

--------------------------------------------

كلمه صغيره اريد ان اقولها :

عندنا كل حاجه و العكس او ان حياتنا بقت كلها ميكسات

كله حسب المصلحه (الا قليلا حتى لا اظلم احدا)

1- الجيش كان حلو ووطنى و المشير هو المنقذ و هو من نفذ القانون و حمى البلد و نال ارفع الاوسمه ثم ………انتم عارفين الباقى

2- ايه اللى وداهم هناك و التظاهر ليس صحيحا و ما الى ذلك و برضه انتم عارفين الباقى

3- السيسى هو اذكى الرجال و اشجع الرجال و له اصوله الاخوانيه و شبعنا من صوره و هو بيجرى مع قواته فى تمارين الصباح و تسقيفه للوزير الشباب الرياضى و زهقنا من صور الصلاه فى وحدات الجيش و السيسى يأمر بوقف التدريب وقت الصلاه ثم ………..انتم اكيد عارفين الباقى

4- تفجيرات سيناء دا من شغل المخابرات و هى من تقتل اولاد الجيش بدم بارد علشان تهيج الوضع ثم نرى تصريح البلتاجى الشهير ثم بخخخخخخخخخخ

5- المتظاهرون هم من يريدون الشرعيه و عددهم هم من يميز اغلبيتهم و عند الدعوه لعدد مكافئ نرى انه يقال انها دعوه للتقاتل , مش الفروض ان كل شخص بيدعو انصاره ليثبت انه على حق

6- المظاهرات هاتخرب البلد و توقف عجله الانتاج ثم ……… انتم عارفين الباقى

7- فين الريس اللى مجابش حق حد و بعدين ……….اصبروا دا الريس لسه جديد

8- امريكا مع الاخوان ثم امريكا مع السيسى ضد الاخوان ثم امريكا اليوم ترفض ارسال 4 طائرات لمصر (سمعته بنفسى من اذاعة لندن )

9- الشيخ الفلانى هو سفير الاسلام و القامه السلفيه و و و و و ثم هذا الشيخ لا يمثل الا نفسه لانه قال مقوله ليست على هوى اتباعه و برضه علشان نكون منصفين الطرف التانى عمره ما جاب سيرته انما لما وجد مقولته على هواه افرد لتلك المقوله البرامج و البث المفتوح و اعادها عشرات المرات

10 – واحد نازل عاوز الشرعيه وواحد تانى نازل ضده لانه عاوز برضه الشرعيه بتاعته , هى الشرعيه دى هاتفضل متلطمه كده بين الجميع و كله عاوزها على مزاجه و محدش قادر يقول شكلها ايه هى ملهاش اهل يسئلوا عليها , يا راااااااااجل دى فكرتنى بزهره و ازواجها الخمسه لما كلهم قالوا دى مراتى انا

================================

اذا كنت ضد هذا الكلام , هل تعتقد انى اكرهك او اقول عليك خروف او حمار

ابسلوتلى , هاقول عليك اكيد فاهم حاجه تانيه انا مش قادر افهمها

لانى طول عمرى اقول انى حكمى دائما قاصر

لانى لا امتلك كل المعلومات الصحيحه التى يمكننى الحكم من خلالها

و انما امتلك ما يريد البعض جعلنى امتلكه

============================

كلامى ليس ضد فصيل او مع فصيل اخر انما هو عباره عن حاله

كل ما املكه هو قول

وافوض أمرى الى الله إن الله بصير بالعباد

اللهم ارزقنى البصيره و ارزقنى رؤيه الحق حقا و ارزقنى اتباعه

ما هو الحل

ملحوظه صغيره :

موضوع قديم تم نشره على مدونتى القديمه بتاريخ 20 - يوليو - 2013 و احببت ان اضعه هنا كى تكون كتاباتى كامله فى مكان واحد.

مدونتى القديمه

--------------------------------------------

اكتب هذا البوست و انا عارف ان مفيش حد هيقرأ ما اكتبه و لكنى اريد ان اقول اى شئ و كنت قد وعدت نفسى بعدم الكلام فى اى شئ مما يحدث الان فى مصر لقناعتى الشديده انها فتنه و يجب ان التزم الصمت فيها و ادع امر العامه

و لكن ضاق صدرى بما احمله و اشاهده كل يوم فقررت ان اكتب لنفسى على الاقل لكى انظر بعد انتهاء الفتنه الى ما كتبته و اعرف هل كنت على صواب ام كنت مخطئا

البدايه كنت مؤيد لمرسى كرئيس جديد به نزعه دينيه افتقدناها طويلا 

و مع الوقت كان تأييدى يقل حينا و يضعف حينا اخر و كنت انتظر منه بفروغ الصبر ان يكون هناك الجديد الذى نتظره جميعا 

من تحسن للأحوال الداخليه فى البلد و كنت متأكد ان هذا لن يأتى بين عشية و وضحاها و كان هذا سبب تأييدى له لأخر لحظه

و لكنه للأسف كان يحرجنى كلما تحدث الى الشعب 

كنا ننتظر منه الكلام الذى سيريح الشعب و لكنه كان يأخذ من رصيده لدى الشعب كل شويه حتى كانت النهايه بالنسبه لى معه و هو الخطاب قبل الاخير , حيث كانت البلد بأكملها بتغلى و انتظرت خطابه الذى اطال فيه ايما تطويل و لكنى لم اخرج منه بشئ يشفى صدرى و ايقنت وقتها انه لا فائده معه و كان نفسى يرحل و لكن بالطريقه الصحيحه حتى تكون سنه ابتدعها و تتأصل فينا و لكنه للأسف شارك فى هدم هذا بنفسه 

قد اكون مختلف معه فى اشياء كثيره و لكنى كنت اؤيده لانه اول الطريق لحياه كما يحلو للبعض ان يسميها (ديموقراطيه)

المهم مش هاطول على نفسى

و حصل اللى حصل و مع انى لم اكن مستريح له و لكنى من انصار يجب التعامل مع الموقف الحالى بدلا من البكاء على اللبن المسكوب 

و لكنى فوجئت بحشود للأخوان و بعدها انضم لهم الكثير من مختلف الطوائف و لم اكن سعيدا بهذا 

فالدكتور مرسى نجح فى خلال حكمه فى تجميع اعداؤه فى مكان واحد و الامر انه اضاف اليهم من كاناو يناصرونه 

و لذا كانت تلك الحشود بالنسبه لى مقلقه لانها بفرض و ان نجحت فانها سوف تواجه فيما بعد الشعب كله وليس السيسى فقط

فهناك حاله من الكره كبيره لهم 

و للأسف اجدهم يقعوا فى نفس الخطأ , يحاولوا فتح نفس الباب بنفس الطريقه 

و للأسف هناك الكثير منهم فى اعتقادى تغلبهم حماسة الدين فى الانضمام لهم و هم مستغلون ممن يريد السلطه 

و ارى انه كان الاولى ان يعلنوا انهزامهم فى تلك الجوله و يعودا الى الشعب و يعملوا من جديد فى طرق شرعيه لينالوا ما يريدون اي ما كان الذى يريدونه

و كل يوم اتفكر هل كل هؤلاء غلط و انا اللى صح 

و اجد نفسى محتار اصفهم بوصف غير جيد و فى نفس الوقت لا ارضى عن ما يفعلون

و اجد ان ما يفعلونه هو الخطأ بعينه 

هى دماغهم مصوره ان دا جهاد للدين

و لكن عقلى يرفض انه جهاد , طالما وصل الموضوع لقتل روح حتى ان كان الطرف الاخر هو المخطئ و هم الصح 

انا لست اريد الجهاد و لكنى لا استطيع ان اجاهد بشكل يكون هناك ضحايا ابرياء لا يعرفوا لم قتلوا 

يعنى بفرض ان لهم مسيره سلميه و طلع عليهم ناس يضربوهم و هم حاولوا الدفاع عن انفسهم بشئ من ممتلكاتى  و اصبحت انا متضرر من هذا و نزلت للدفاع عن ممتلكاتى فتشابكت معهم 

فتم قتلى (فهل انا شهيد لانى ادافع عن مالى ) و اذا قتلتهم فهل هم شهداء و انا قاتل و جزائى جهنم لانى قتلت نفس

شفتم العمليه متشابكه ازاى 

لو الجهاد ضد عدو ليس على منى او من دينى كاليهود مثلا فلن اتردد فى الدفاع عن ارضى و لكن ما نحن فيه الان يرفضه عقلى تماما

يجب ان يرجعوا الى بيوتهم 

البلد لازم تمشى حتى لو كان دا انقلاب و حتى لو رجعت للحكم العسكرى 

ايه المانع نشتغل من تانى 

بتوع بلاد بره لما بيفكروا و يخططوا غالبا احفادهم هم من يجنى ثمار تخطيطهم 

هرتزل لما اعلن دولة اليهود , اسرائيل اصبحت دوله بعد ذلك بكام سنه و هل هو عاصر هذا او جنى ثمرة يده

ليه احنا مصريين ان لازم نتذوق ما نريده 

لازم دلوقتى يحصل 

ايه المانع انه مايحصلش و ترجع تشتغل صح من الاول و تحاول تانى و تالت 

انا شايفهم بكده بيخسروا كل امل لهم فى المستقبل و اللى بعدهم علشان يبدأ هايكون الموضوع اصعب بكتيييييييييييير 

هم جعلوا نفسهم الان اعداء لطائفه عريضه من الشعب 

قول عليه مغيب او قول شعب غير واعى و لكنه يظل طائفه من الشعب لها وزنها

طيب ايه الحل

يا رب يسر الخير للجميع و انر بصيرتنا قبل ابصارنا

نكمل وقت تانى يمكن الاحداث تأتى بجديد

بسم الله , نبدأ على بركة الله

بسم الله الرحمن الرحيم

و به نستعين

نفتتح المدونه

اللهم اجعل لنا من امرنا يسرا  و هب لنا من لدنك رحمه

----------------

عاوز اكتب و مش عارف هاكتب ايه بس عاوز اكتب , نقلت من المدونه القديمه لانى وجدت البلوجر اسرع فى الكتابه و التعديل

اشكر كل من يزور المكان , لانه ساقه حظه العسر لرؤية المدونه و ارجو ان يستفيد منها بأى حاجه توضع فى ميزان حسناتى يوم القيامه